കാറ്റ്

കാറ്റ്
----------
അകലെ മേഘങ്ങളേ
വകഞ്ഞുമാറ്റി കത്തി
നില്‍ക്കുന്ന മീന സൂര്യന്‍റെ
ചൂടിനെ ശമിപ്പിക്കാന്‍
പാടവരമ്പത്ത് തളര്‍ന്നിരിക്കും
വാടിയ മുഖങ്ങള്‍ക്കു
ഒരു തലോടലായി തഴുകിവരാറുണ്ട്

നക്ഷത്രങ്ങള്‍ നര്‍ത്തനമാടും രാവില്‍
ആസ്വാദകരായി ഭൂമിക്കൊപ്പം
മാനം നോക്കി കിടക്കും നേരം
നനുത്ത പ്രണയത്തിന്‍ സംഗീതമാകും

നിലാവു തനിച്ചാകുമ്പോള്‍
ജാലകവാതിലില്‍‍ക്കൂടി
മെല്ലെ മെല്ലെ ‍ കടന്നു കാതില്‍
കഥകള്‍ പറഞ്ഞുതരും

കര്‍ക്കിടകത്തിലും
തുലാമാസത്തിലും
മഴയോട് യുദ്ധംചെയ്യാറുണ്ട്
ഇടവത്തിലെ മഴയില്‍
ചിലപ്പോള്‍ മൌനമാകും

ചെറുതീയില്‍ മകര
മഞ്ഞിനെയുരുക്കുമ്പോള്‍
കുളിരായി കടന്നുപോകാറുണ്ട്

ഉരുകുന്ന മനവുമായി
ജാലകവാതിലില്‍
വിധൂരതയിലേക്ക് നോക്കി
നില്ക്കും നേരം ആശിച്ചു പോകാറുണ്ട്
ഒരു കാറ്റ് വന്നിരുന്നുവെങ്കിലെന്നു!!!