വിപ്ലവം
------------------
ചിലന്തി വലകെട്ടിയഅലമാരകളില്‍
ചിതലുകള്‍ വിപ്ലവം നടത്തുന്നുണ്ട്

അരപട്ടിണിയില്‍ ഗര്‍ജിച്ച
വാക്കുകളോടാണ് ചിതലുകളുടെ
വിപ്ലവം ...

ഗോഡ്സയുടെ വെടിയുണ്ട പതിച്ച
സ്ഥലം ചിതലുകള്‍ ബഹുമാനിച്ചില്ല

ജീവനുള്ള ഗാന്ധിജിയുടെ
ചിത്രത്തിനോടും ബഹുമാനം കാണിച്ചില്ല

മറ്റു പല മഹാന്മാരോടും
വിപ്ലവംനടത്തി ചിതലുകള്‍
മുന്നേറുന്നുണ്ട് ..

നിരീശ്വരവാദം പറഞ്ഞ
ചില പുസ്തകങ്ങളില്‍
ഗൌളി കാഷ്ടിച്ചത്
ചിതലുകള്‍ അപശകുനമായി കണ്ടില്ല
ലോകമഹായുദ്ധങ്ങള്‍
ഭയപ്പെടുത്തിയതുമില്ല

കണ്ണുനീരുവീണ ചില വരികളിലും
രക്തം മഷിയായാ പദങ്ങളിലും
ചിലരുടെ പ്രതീക്ഷകളിലും
സ്വപ്നങ്ങളിലും  വിശപ്പകറ്റി
ചിതലുകള്‍ നന്ദി പറയുന്നു ...























 

മലാല നീ തിരിച്ചു വരണം

മലാല
---------------
'പേനകൊണ്ടെഴുതാന്‍
പഠിപ്പിച്ച ദൈവ നാമത്തില്‍
നീ വായിക്കുക '

നൂറ്റാണ്ട് പതിനഞ്ചിനുമുന്‍പ്
അക്ഷരം അറിയാത്ത
അറബികളോട് ദൈവം പറഞ്ഞു

ഇരുണ്ടയുഗം അന്നസ്തമിച്ചു

മലാലാ.... നിന്‍റെ ശിരസില്‍
തറച്ച വെടിയുണ്ടകള്‍
ഇന്നത്തെ കറുത്ത പകലില്‍
ഉദയംചെയ്ത ദൈവ നാമം
മറന്നുപോയവരുടെതാണ്...

മലാലാ ...നിന്‍റെ ഡയറി കുറിപ്പുകള്‍
സ്വാത്ത്  താഴവരയില്‍ ഉദയം ചെയ്ത
കറുത്ത സൂര്യനെ അസ്തമിപ്പിക്കട്ടെ ...

മലാലാ ....നീ തിരിച്ചുവരണം ..

ലോകം നിനക്കുവേണ്ടി
കാത്തിരിക്കുന്നു ...
ഒപ്പം  നിന്‍റെ
പള്ളിക്കുടവും
ഉദ്യാനവും
പഠനമുറിയും ....









 

മരണം

മരണം
---------------
മരണപ്പെട്ടവരുടെ
മുന്നില്‍ കരയുന്നതു എന്തിനാണ് ?

വരുമാനം നിലച്ചതിന്റെ
നഷ്ടമോര്‍ത്തിട്ടോ അതോ
അടുക്കളയില്‍ പുകയുന്ന
അടുപ്പിന്‍ മുന്നില്‍നില്‍ക്കാന്‍
അടുത്തയാളിനെ തിരയാനുള്ള
സമയ ദൈര്‍ഘ്യമോര്ത്തിട്ടോ ?

സഹതാപ കണ്ണീര്‍
ചത്തവനോടുള്ള
പരിഹാസമാണ്

മരണം വരാന്‍
ആഗ്രഹിച്ച മുത്തച്ഛന്‍
മരിച്ചപ്പോള്‍ ചില മുഖങ്ങള്‍ ചിരിച്ചു
ചിലവുകണക്കുകള്‍ പറഞ്ഞു
ചിലര്‍ മുറുമുറുത്തു

ഏതെങ്കിലും പൊതുശ്മശാനത്തിന്‍
മുന്നില്‍ കിടന്നു മരിക്കണം
മടിയില്‍ അഞ്ഞൂറിന്റെ
നോട്ടും കരുതണം
കുഴിവെട്ടുന്നവന്
ശപിക്കരുതല്ലോ ...






 

മഴത്തുള്ളിക്കള്‍
ഭൂമിയില്‍ ചിതറി
മരിച്ചുവീണത് പ്രണയിച്ചു
കൊതി തീരുംമുന്നെയാണ്
ഒന്നിനു പിറകെ
ഒന്നായി മണ്ണിനെ
ചുംബിച്ചു ചിതറിവീണു

മണ്ണുമാകാശവും
പ്രണയിച്ചതും
പിണങ്ങിയതും
മഴത്തുള്ളികളില്‍ക്കൂടിയാണ്

പ്രണയം മഴത്തുള്ളികളാതു
കണ്ണുനീരിനെ മൂടാന്‍

മഴയുള്ളപ്പോള്‍ നിലാവ്
ആമ്പലിനെ കാണാതെ കരയും

ഒറ്റപ്പെട്ടുപോയ ചില നക്ഷത്രങ്ങള്‍
മഴതോര്‍ന്ന നേരം അകന്നുപോയ
പ്രേയസ്സിക്കായിപാടും വിഷാദ ഗാനം
താഴെ മണ്ണിലെ പ്രണയങ്ങള്‍ക്കായി
നനുത്ത കാറ്റ് വീണ്ടും ആലപിക്കന്നത്
തുറന്നിട്ട ജാലകവാതിലില്‍ക്കൂടി കേള്‍ക്കാം

ഇനിയെന്റെന്‍ സഖി ഉറങ്ങട്ടെ ...

ഒരു മഴതോര്‍ന്ന രാവില്‍
ഒരുകഥയുടെ തലോടലില്‍
ഒരു പ്രണയ ഗീതംകേട്ടു
അടുത്തൊരു മഴയുടെ
ഇരമ്പലിനുമുന്നേ ...........















 

സ്വപ്നം

സ്വപ്നം
------------------
നിറങ്ങള്‍ ചിത്രമെഴുതിയ
ജാലകവാതില്‍ തട്ടി
നരച്ച പ്രഭാത കിരണങ്ങള്‍
നിഴല്‍ചിത്രം വരക്കും മുന്‍പ്‌
മേഘവാതില്‍ അടച്ചു
നിലാവ് ഉറങ്ങാന്‍
കിടക്കവിരിക്കുന്നതിനും
നക്ഷത്രങ്ങള്‍ മൌനമായി
യാത്രപറഞ്ഞു പോകുന്നതിനും
മുന്‍പുസ്വപ്നം മരിച്ചിരുന്നു

ഇന്നലെ മറന്നുവെച്ച
കവിതകളില്‍
സ്വപ്‌നങ്ങളുണ്ടായിരുന്നു

ഓര്‍ത്തെടുക്കാന്‍
മറന്ന സ്ഥലംതേടി
മദ്യം വിളമ്പിയ
പെണ്ണിന്‍റെ കൊലുസിന്
കിലുക്കം കേട്ട വെളിച്ചം
മറച്ചുവെച്ച മുറിയിലെത്തി

ഇവിടെ മറന്നുവെച്ചതു
ലഹരിയും പിന്നെ കാമവും

കലാലയത്തിലെ ചുവരുകളില്‍
മറന്നുവച്ചതു നാളയുടെ
പ്രതീക്ഷകളെയായിരുന്നു

പള്ളിക്കുടത്തിലെ
പുറകിലെ ബഞ്ചില്‍
ദാരിദ്ര്യമുണ്ടായിരുന്നു

പിതാവിന്‍റെ
കല്ലറക്കുമുന്നില്‍
കവിതകള്‍ വാക്കുകള്‍
മുറിഞ്ഞു ചിതറിക്കിടക്കുന്നു

പെറുക്കിയെടുത്തു
കൂട്ടിവായിച്ചപ്പോള്‍
സ്വപ്നം മാത്രം മഷി പടര്‍ന്നു
മരിച്ചിരുന്നു ......


 

ഭ്രാന്ത്
-----------------

നക്ഷത്രങ്ങള്‍ എന്തിനാണ്
കരയുന്നത് ?

പിതൃ നഷ്ടവും
മാതൃ സ്നേഹവും
അവകള്‍ക്ക് അന്യമായിരുന്നോ ?

മുലകള്‍ വളര്‍ന്ന
പെണ്മലരുകളുടെ
മാംസം ഭക്ഷിക്കുന്ന
കഴുകന്മാരുണ്ടോ അവിടെ ?

ദാരിദ്ര്യം മടിക്കുത്തഴിക്കാന്‍
പ്രേരിപ്പിച്ച ജീവിതങ്ങള്‍
ശേഷിപ്പിച്ച കുരുന്നുകളുടെ
കളിപ്പാട്ടങ്ങളുടെ കിലുക്കവും

വെളുത്തവന്റെ
ചെരിപ്പിനടിയില്‍
അമര്‍ന്നുപോയ
തൊലികറുത്തവന്‍റെ
രോദനവും കേള്‍ക്കാമോ അവിടെ ?

ദൈവത്തെ അടക്കം ചെയ്ത
കല്ലറക്കുമുകളില്‍
മനുഷ്യ ദൈവത്തിന്‍റെ
പ്രതിഷ്ടകളുണ്ടോ അവിടെ ?

ശൂലവും  പിറയും കുരിശും
രക്തമൊഴുക്കാറുണ്ടോ?

ആകാശത്തുനോക്കി
സംസാരിച്ചവര്‍ ഭ്രാന്തന്മാരെന്നു
പറഞ്ഞതു ആരാണ് ?













 

ഇടവഴി
-------------
ഇന്നലെ ഓര്‍മ്മകള്‍
ഇടവഴിതേടി യാത്രപോയി

പൂഴിമണ്ണു നിറഞ്ഞ വഴിയില്‍
കൈതക്കാടുകള്‍ കാറ്റിലാടും

മണമില്ലാതെ ചുവപ്പുടുത്ത്
ചെമ്പരത്തിപ്പൂവ്
കരിവളകൈകളെ കാത്തിക്കും

കൈയൊന്നു തൊട്ടാല്‍
മുഖം പൊത്തിക്കരയുന്ന
തൊട്ടാവാടി കലപില ശബ്ദത്തിന്‍
കുരുന്നുകളെ പേടിക്കും

വെയില്‍ വെട്ടമിട്ടു ഇടയ്ക്കു
എത്തിനോക്കി പോകും

പാദസര കിലുക്കം കേള്‍ക്കാന്‍
കിഴക്കന്‍ കാറ്റിനൊപ്പം വരും
ചെറുക്കന്‍മാരെ തുറിച്ചു നോക്കും
ഇടവഴിയിലെ മിണ്ടാപ്പൂച്ചകള്‍

പേരറിയാപൂവുകളില്‍
തേന്‍ നുകരും ശലഭങ്ങള്‍
ഇളംകാറ്റില്‍ നൃത്തമാടി

അന്തിചോപ്പില്‍മുങ്ങികുളിച്ചു
ഇരുട്ടില്‍ ഉറങ്ങുമ്പോള്‍
ചീവീടുകള്‍ മൂളിപ്പാട്ടു പാടും ....

പൂരം കഴിഞ്ഞു വരുന്നവര്‍ക്ക്
നിലാവ് വിളക്കു പിടിച്ചു

അച്ഛന്‍റെ വരവും കാത്തു
ഇടവഴിയില്‍ ഇമകള്‍ അനകാതെ
അമ്മ നോക്കി നില്‍ക്കും

 ഏതോ കോണ്ക്രീറ്റ്
പാതക്കടിയില്‍ ഇടവഴി
മരിച്ചു വീണതു മുതല്‍
കാറ്റും ശലഭവും തമ്മില്‍
കണ്ടിട്ടില്ല .....