ഗന്ധം
-------------
പകലിനും രാവിനും
രക്തത്തിന്‍റെ ഗന്ധമാണ്

നരമ്പു മുറിച്ചു ആത്മഹത്യ ചെയ്ത
പെണ്ണിന്റെ ഉണങ്ങിയ രക്തത്തിനു
മരിക്കാത്ത പ്രണയത്തിന്‍ ഗന്ധം

ലോറി കയറി ചതഞ്ഞരഞ്ഞ
ശവത്തിന്‍ ഓര്‍മ്മകളായി
റോഡില്‍ ഉണങ്ങിക്കിടന്ന രക്തത്തിനു
പകലിന്‍റെ ഏതോ കോണില്‍ പറയാതെ
അസ്തമിച്ച സൂര്യനെ പ്രണയിച്ച
കടല്ക്കാറ്റിന്‍ കണ്ണീരിന്‍ ഗന്ധം

ആരോ പകുതി മുറിച്ചെടുത്ത ശിരസില്‍ ‍
അടയാത്ത മിഴികളില്‍
പറ്റിയിരുന്ന രക്തത്തിനു
ദൂരെ കൂട്ടില്‍ കാത്തിരിക്കുന്ന
പൈതങ്ങളെ ഉറക്കുന്ന പാട്ടിനൊപ്പം
തഴുകിവരും കാറ്റിന് ഗന്ധം

പകലിനും രാവിനും
രക്തത്തിന്റെ ഗന്ധമാണ്









 

തലസ്ഥാനം

തലസ്ഥാനം ഒരു പകലില്‍
---------------------------------------
കൊടികള്‍ മാറി വന്നിട്ടും
ഒളിപ്പിച്ചുവെച്ച നീതിക്ക് വേണ്ടി
സെക്രട്ടറിയേറ്റിന്‍ മുന്നില്‍
വെയിലേറ്റു നരച്ച
കുടിലില്‍ ചില സമരമുഖം

ഭരണം നഷ്ടപ്പെട്ട കൊടികളുടെ
സമരം ജലപീരങ്കിയും ലാത്തികളും തുരത്തി

ആക്രി പെറുക്കാന്‍ വന്ന പാണ്ടിചെക്കന്
പല കമ്പനിയുടെ "ഇണ "നഷ്ടപെട്ട ചെരുപ്പുകള്‍

ചനാല്‍ വണ്ടികളുടെ മറവില്‍
ഒരു സമരക്കുടില്‍ മുങ്ങിപ്പോയി

വിശന്നു കാവല്‍ നിന്ന ഒരു തൊപ്പിക്കാരന്
കോട്ടുവായ ഇട്ടതിതിന്‌ മന്ത്രിയുടെ വക ശകാരം

സഭ കഴിഞ്ഞു പുറത്തുവന്ന നേതാക്കളുടെ
പ്രഹസനങ്ങള്‍ ഫ്ലാഷ് ന്യൂസാക്കാന്‍
മത്സരംനടത്തുന്നു  ചാനലുകള്‍

പ്രതീക്ഷകള്‍ അസ്തമിക്കാതെ 
സമരക്കുടിലുകള്‍
പുതിയ പുലരി സ്വപ്നം കാണുന്നു











 

കേരളം
--------------
നല്ലൊരു കുഴിവെട്ടണം
പത്തു ബംഗാളികളെ
കൂലികൊടുത്ത്
ശവമടക്കവും നടത്തണം
പറ്റുമെങ്കില്‍ ഇവിടെ
"കേരളം " ജീവിച്ചിരുന്നു എന്ന്
ഒരു ബോര്‍ഡും സ്ഥാപിക്കണം
 

റോഡുകള്‍ ..

റോഡുകള്‍‍
------------------

ഹര്‍ത്താലിലിന്
പകലുറക്കത്തിനായി
'റോഡു ' പായ വിരിക്കുമ്പോള്‍
ചില ഒറ്റപ്പെട്ട വാഹനങ്ങള്‍
ബലാത്സംഗം ചെയ്തു
കടന്നുകളയും !!

സംശയം ..

അസ്ഥിത്വം
----------------
ദൈവലോകത്തെത്തിയ
ചില മനുഷ്യരുടെ മുന്നില്‍
അസ്ഥിത്വം തെളിയിക്കാന്‍
ബുദ്ധിമുട്ടുന്നു  'ദൈവം '

ഭംഗി
--------
നിറങ്ങള്‍ക്ക് ഭംഗിയുണ്ട്
തെളിഞ്ഞ ആകാശത്തിനു
നീല നിറം വരുമ്പോള്‍
താഴെ പറക്കുന്ന മേഘങ്ങള്‍
ഒന്നുകൂടി വെളുത്തു സുന്ദരിയാകുന്നു

കുങ്കുമം കലര്‍ന്ന സന്ധ്യക്കും
നിലാവ് പെയ്യുന്ന രാത്രികള്‍ക്കും
ഭംഗിയുണ്ട്

കറുപ്പിനു ഭംഗിയുണ്ടെന്ന്
ആരോ കളവു പറഞ്ഞതാണ്

ആകാശം കറുത്ത്
കരയുമ്പോള്‍
നരച്ച  കറുത്ത കുട
നിവര്‍ത്തി പുലഭ്യം പറഞ്ഞു
അച്ഛന്‍ പുറത്തേക്കു പോകും

കരിവാളിച്ച ഒരു മുഖം
അകത്തിരുന്നു കരയും ..
-------------------------------------

ചരമം
-----------
പത്രം കിട്ടിയാല്‍
ആദ്യം ചരമകോളം നോക്കും !!

അച്ഛന്‍റെ നല്ലൊരു
ചിത്രമെടുക്കണം

നല്ലൊരു കുറിപ്പും
കൊടുക്കണം

അച്ചമ്മയുടെയും
അപ്പുപ്പന്റെയും
പേരുകള്‍ ചോതിച്ചറിയണം

തറവാടിന്‍റെ പേരോട് ചേര്‍ത്തു
അച്ഛന്‍റെ പേരുമെഴുതണം